Kuri uyu wa gatanu tariki 6 Nzeri, Banki ya BPR yasinyanye amasezerano na ikigo mpuzamahanga cy’imari (IFC), kimwe mu bigize banki y’isi.
Ubu bufatanye bujyanye n’ishoramari rya miliyari Rwf 53 zigenewe gufasha ibigo bito n’ibiciriritse mu nzego z’ingenzi n’ubuhinzi n’inganda, aho 25% by’amafaranga azatangwa bizaharirwa ubucuruzi bw’abagore.
Amafaranga yatanzwe na IFC ntabwo ari inkunga ahubwo azakoreshwa nk'inguzanyo, aho biteganyijwe ko Banki ya BPR izatanga ayo mafaranga mu gihe cy’ amezi atatu.
Inguzanyo izishyurwa mu gihe cy’imyaka irindwi, amafaranga yatanzwe mu bice bitandukanye hashingiwe ku byiciro by’abakiriya ba banki.
Muri uwo muhango, Umuyobozi wa Banki ya BPR mu Rwanda Madamu Patience Mutesi, yagize ati: "Banki ya BPR yishimiye ubu bufatanye. Kuva yashingwa mu 1975, banki ntiyahwemye kwibanda cyane ku bigo bito n'ibiciriritse. Ndetse na nyuma yo kwishyira hamwe na Banki y’ubucuruzi ya Kenya mu mwaka wa 2022 ikaba banki y’abantu ku giti cyabo ndetse n’ibigo by’ubucuruzi, twakomeje kugendera ku mahame yacu yo gufasha ibigo bito n’ibiciriritse.
Ati: “Iyi nguzanyo izadufasha kwagura imishinga mito n'iciriritse no gukomeza gutera inkunga ubucuruzi bw'u Rwanda, tugira uruhare mu cyerekezo cy'igihugu mu bukungu bushingiye ku bikorera.”
Ku wa gatanu, tariki ya 6 Nzeri, BPR Banki y'u Rwanda yasinyanye amasezerano n’ikigo mpuzamahanga cy’imari (IFC), kimwe mu bigize umuryango mugari wa Banki y’isi.
Ku bijyanye n’ibindi bicuruzwa bito n'ibiciriritse, banki itanga ibisubizo nko gutera inkunga ishoramari n’inguzanyo nto.
Yagize ati: "Urugero, ubucuruzi bwitabira amasoko bushobora kutuzanira inyemezabuguzi zabwo, maze tukabaha 70 ku ijana by'agaciro kayo kugira ngo babashe gukomeza ibikorwa byabo neza. Dufasha kandi ibigo mu bijyanye n’ingwate,aho amasosiyete adafite ingwate gakondo ashobora gukoresha imigabane cyangwa ibicuruzwa biri mu bubiko nk'umutekano mu kubona inkunga ".
Banki itanga n’inguzanyo ishingiye ku mutungo, igafasha ibigo by’ubucuruzi kugura ibikoresho cyangwa imodoka, aho inguzanyo yishyura 80 ku ijana by'agaciro k'uwo mutungo.
"Ku bijyanye n’inkunga yo kwagura inganda cyangwa kubaka ububiko, dutanga amahitamo y’ishoramari afasha mu iterambere ry’ubucuruzi. Twiyemeje gukorana bya hafi n'ubucuruzi, dutanga ibisubizo byihariye by’imari bijyanye n’ibyo bakeneye."
Avuga ku mpungenge rusange, Mutesi yashishikarije ubucuruzi kudatinya inguzanyo. "Abantu benshi bagira gushidikanya ahanini ku bw’impungenge z'inyungu zihanitse, ariko iyo urebye ku gaciro k’ifaranga, usanga inguzanyo zihendutse kurusha uko bigaragara. Kandi ku baterwa impungenge n’ingwate, dukorana n'ibigo bifite uburyo bwo gutanga ingwate nka BDF n'abandi bafatanyabikorwa kugira ngo dutange ibisubizo,"
Umuyobozi wa IFC mu karere ka Afurika y'Iburasirazuba, Mary Porter Peschka, yashimangiye umuhate wa IFC mu gushyigikira u Rwanda mu ngamba z’iterambere rwihaye, zibanda ku iterambere ry’abikorera.
Yagize ati "Kuri twe BPR niwe umufatanyabikorwa ukwiriye. Ni banki iri gukora akazi gakomeye mu bijyanye n’ibigo bito n’ibiciririrtse kandi bafite umuhate mu kuzamura urwego rw’ibikorwa birebana n’ibidukikije, imibereho myiza n’inguzanyo".
Peschka yavuze ko inguzanyo ya IFC igamije korohereza abantu kubona amafaranga afasha imishinga mito n'iciriritse yo mu Rwanda, hibandwa cyane cyane ku buhinzi, inganda, ndetse n’ubucuruzi bw’abagore.
Yongeyeho ati: "Twishimiye ko BPR yiyemeje kugeza 25 ku ijana by'ayo mafaranga kuri ba rwiyemezamirimo b'abagore. Gushyigikira imishinga mito n'iciriritse y’abagore ni ingenzi rwose kugira ngo iterambere rirambye mu Rwanda."
Ubu bufatanye burebana n’ishoramari rirenga miliyari 53 z'amafaranga y'u Rwanda yo gutera inkunga imishinga mito n'iciriritse (SMEs).
